كلمات أغاني 6

#كلمات_أغاني 6 (علشان الكلام الحلو ما يتوهش ف المزيكا)
أغنية اليوم اختيار صديقة البرنامج: لميس الخطيب 😀

#هو_إنتي_ليه_بعيدة_كده #ممدوح_بيرم
(من فيلم #هي_فوضى)

هو إنتي ليه بعيدة كده؟.. ومستحيلة بالشكل ده؟
فرحة حياتي ومرها.. أيامي بيكي عشتها
إنتي الحقيقة في دنيا زيف
وإنتي اللي دبت ف حبها.. باقدر علي الناس كلها
وبابقى قدامك ضعيف
وبتعندى وأنا.. أدوب نِدَا

************

قلبي على كفي افتحيه.. هاتلاقي صورتك ساكنة فيه
حتى وأنا ف قلبي المرار.. ماباشوفش غيرك ليل نهار
يا وردة مغسولة بندى
صافية ورقيقة وطيبة.. وبعيدة وإنتي قريبة
يامحيرة كل القلوب.. باكتب غرامك ع الدروب
وارسم ملامحك ع المدى
هو إنتي ليه بعيدة كده؟

***********

باصحى على صورتك وأنام.. وألقاكي ينساني الكلام
أرسم أمل يبقي سراب.. وأحلم بفرح ألقاه عذاب
وأنده يجاوبنى الصدى..
عاشق انا قلبي عنيد.. ومسيري هوصلك اكيد
والاقكي يا قمري البرئ.. لو حتي راح يخلص طريق
والقي طريق غيره إبتدا

#إبراهيم_عبد_الفتاح
الشاعر إبراهيم عبد الفتاح تخصص بشكل كبير في الأغاني الدرامية في الأفلام والمسلسلات زي: حين ميسرة- هي فوضى- ليلة البيبي دول- دكان شحاته- المش مهندس حسن- الريس عمر حرب- عسكر في المعسكر- أسرار البنات- ومسلسلات: الأدهم- أفراح إبليس- الدالي- كليوباترا- ريش نعام- سلسال الدم- ريش نعام.
وأغنيات: لما الشتا يدق البيبان (علي الحجار)- لما الكون بينام (حنان ماضي)- وإنت بعيد (حنان ماضي)- شباك قديم (حنان ماضي)- أنانية (خالد سليم)- مش عايزة القمر (أنغام)- وحدي (وردة).. وغيرها..