عبده حوارات (4) - سلسلة مسلسلة لا تقرأ بتسلسل

عبده حوارات : نعم

مشيراً بسبابته في غضب : الجزمة الجزمة الجزماااااة .

عبده حوارات : مالها ؟!

ساخراً : أبداً انت بس حاططها في وشي ؟

عبده حوارات : أنا حاططها في رجلي !!

متنرفزاً : ماهي رجلك في وشي ....

عبده حوارات : أنا رجليا في البنطلون

يائساً : لو مانزلتش رجليك أنا هامشي

عبده حوارات : يعني انت عايزني أنزلها علشان تقعد؟

مستبشراً : أيوه يا سيدي

عبده حوارات : بس أنا ماحبش حد يقعد علي رجلي !!!

عبده حوارات (3) - سلسلة مسلسلة لا تقرأ بتسلسل

عبده حوارات : اللي هو إزاي يعني ؟
مندهش : هو إيه اللي إزاي ؟! باقولك عايز عشرة جنيه ...
عبده حوارات : مش فاهم ...
متنرفز : هو إيه اللي مش فاهمه يا عم هو أنا باتكلم لاوندي ؟؟؟
عبده حوارات : إنت عمرك روحت هناك ؟ 
مستغرب : فين ؟!
عبده حوارات : لاوندا ؟ 

محاولاً التركيز : لاوندا ؟! يعني إيه ؟! 

عبده حوارات : هو إيه اللي يعني إيه ؟! باقولك عمرك روحت لاوندا ؟! 

محاولاً التركيز تاني : مش فاهم ...

عبده حوارات : هو إيه اللي مش فاهمه باقولك عايز عشرة جنيه 

متفاجئاً : عشرة جنيه ؟! لأ ماعيش و الله ...

عبده حوارات : طب يا عم معطلني جنبك م الصبح ليه !!!

عبده حوارات (2) - سلسلة مسلسلة لا تقرأ بتسلسل :))

عبده حوارات : إيه عايز إيه ؟؟

عمرو دياب : باناديك تعالي ...

عبده حوارات :أجي أعمل إيه طيب ؟؟ 

عمرو دياب : يحلو العمر بيك ...

عبده حوارات : انت فاكرني كيس سكر يا عمرو ؟!!

عبده حوارات (1) - سلسلة مسلسلة لا تقرأ بتسلسل :))

عبده حوارات : جوااااز ؟! مين اللي جاب سيرة الجواز ؟!!
مصدومة : أصلي كنت متخيلة إنـ...

عبده حوارات : أديكي قولتي متخيلة ... يعني بتحلمي يا ماما
منكسرة : أنا فعلاً كنت باحلم إننا ... إننا ...
عبده حوارات : إننا إيييه ؟
خبيثة في هيئة خجولة جداً : إننا نعيش مع بعض !!
عبده حوارات : كل الناس بتحلم تعيش مع بعض ... بس ماحدش فكر هو بعض هايجيبلنا كلنا أماكن منين علشان نعيش معاه !!
منبهرة مذهولة : إيه ده ؟ أنا عمري ما فكرت ف كده ...
عبده حوارات : و كده عمره ما فكر فيكي !!
لم تسمع جيداً : إييه ؟؟
عبده حوارات : لأ أبداً كنت باكح !!

أحمد مدحت